DC Nyasa azindua Kituo kipya cha Mafuta

Posted on: April 26th, 2025

Mkuu wa Wilaya ya Nyasa Mhe. Peres Magiri Tarehe 26.04.2025  amezindua Kituo kipya cha kuuza mafuta cha Asam Oil kilichopo Mbamba bay Wilayani Nyasa ambacho kinatoa huduma ya mafuta kwa wananchi wa Wilaya ya Nyasa.

Akifanya Uzinduzi huo Mhe.Magiri amewakaribisha wawekezaji kuja kuwekeza Wilayani Nyasa kwa kuwa Wilaya ya Nyasa ni sehemu nzuri ya kufanya uwekezaji wa kibiashara na Utalii kwa kuwa kuna Fursa nyingi za Uwekezaji.

Amezitaja Fursa hizo kuwa na Biashara mbalimbali za  Kilimo cha mazao mbalimbali, Uvuvi katika Ziwa Nyasa, Utalii wa Vivutio vingi vya Utalii vilivyopo Wilayani Nyasa kama vile Fukwe za Ziwa Nyasa, Visiwa vya mbamba bay Lundo na Puulu, Mlima Mbamba na milima ya Livingstone.

Mhe Magiri Ameongeza kuwa upatikanaji wa kituo hicho cha Mafuta kunaendelea kufungua milango ya Ukuaji wa Mji wa Mbamba bay Wilayani hapa kwa kuwa Wawekezaji, wananchi, na watalii wanakwenda kupata huduma bora ya mafuta aina zote na kutatua changamoto ya upatikanaji wa mafuta ya Dizeli na Petroli ikiwa ni pamoja na kupata huduma ya mafuta bora ambayo itawahakikishia safari zao bila wasiwasi.

Aidha amesema Serikali inaendelea kuwakaribisha wawekezaji na itawapa ushirikiano wa kupata Ardhi na miundombinu mingine kwa kuwa Nyasa inakwenda kuwa lango kubwa la biashara katika ukanda wa kusini, na amewataka wananchi kuwapa ushirikiano wawekezaji kwa kuwa wanafika kuleta maendeleo.

Kwa upande wake Mkurugenzi wa Kituo cha Mafuta cha Asam oil amemshukuru na kumpongeza Mkuu wa Wilaya ya Nyasa Mhe Peres Magiri kwa Kumpa ushirikiano na kuahidi kuendelea kuwekeza wilayani Nyasa.

Aidha amesema Huduma zitakazotolewa katika kituo hicho ni pamoja na kuuza Mafuta aina zote, uoshaji wa magari, uuzaji wa vipuri vya magari na huduma zingine nyingi.