DC NYASA azindua kampeni ya upandaji miti.

Posted on: January 16th, 2025

DC NYASA AZINDUA KAMPENI YA UPANDAJI MITI

Mkuu wa Wilaya ya Nyasa Mhe.Peres Magiri amezindua kampeni ya upandaji wa miti katika Kata ya Luhangarasi  ambayo imefanyika katika shamba la shule ya msingi Luhangarasi Wilayani Nyasa.

Kampeni hiyo imeandaliwa na Wilaya ya Nyasa  kwa kushirikiana na Wakala wa Huduma za Misitu Tanzania (TFS) ili kuunga mkono juhudi za Serikali za kutunza mazingira imezinduliwa kwa kupanda miti katika eneo la shule ya Msingi Luhangarasi na kugawa miti Kwa Wananchi wakapande katika maeneo Yao.  

Akimwakilisha mkuu wa wilaya ya Nyasa, Afisa Tawala Wilaya ya Nyasa Bw. Benedicto Nsindagi  amewasisitiza wananchi kuendelea kutunza mazingira kwa kupanda miti na kuitunza ili iweze kukua na kuona matokeo ya upandaji huo.

Amewataka pia kupanda miti ya matunda ili iwasaidie Kwa Lishe na kuondokana na ukosefu wa Lishe duni.

Ametoa wito Kwa Wananchi kuendelea kupanda miti Kwa kipindi chote cha Masika na kushirikiana ili zoezi hilo liwe endelevu kwa kuhimizana kupanda miti mingi na kuitunza ili kuhakikisha mazingira yanaendelea kuboreshwa na isaidie kuleta mvua nyingi zaidi.

Kwa upande  makamu mwenyekiti wa Halmashauri ya wilaya ya Nyasa Mhe, Walariki Kikasi amewahamasisha Wananchi kupanda miti Kwa bidii Kwa kuwa itasaidia kuongeza kipato Kwa Wananchi.

Kwa upande wake Meneja wa TFS wilayani Nyasa bw. Elisha John amesema wakala wa misitu imetoa Miche 30,000 Kwa ajili ya kuwagawia Wananchi ili wapande na kuongeza kipato ikiwa ni utekelezaji wa Ilani ya Chama Cha Mapinduzi, pamoja na Serikali na sera ya Umoja wa Mtaifa katika kuhakikisha suala la mazingira linakuwa namba moja kwa kuwaelimisha wananchi maana ya uhifadhi wa mazingira ili nchi isigeuke jangwa.