Dc Nyasa awataka wananchi kula Vyakula vyenye Lishe Bora

Posted on: October 12th, 2022

Halmashauri ya Wilaya ya Nyasa Tarehe 12/10/2022 imefanya kikao cha Tathimini ya Lishe Robo ya kwanza mwaka 2022/2023 kikao kilichofanyika katika ukumbi wa Ofisi ya Mkuu wa Wilaya ya Nyasa na kuongozwa na kaimu Mkuu wa Wilaya ya Nyasa Mh, Aziza Mangosongo ambaye ni Mwenyekiti wa kamati ya Lishe Wilayani hapa.

Akifungua kikao hicho amewataka wanaume kuacha kunyonya maziwa ya akina mama kwa kisingizio kuwa yanaongeza nguvu za kiume, badala yake wawaachie wanyonye watoto ili wapate afya baora, na wao wajikite kula vyakula bora vyenye virutubisho vya kutosha na vya kiasili.

Amewataka watendaji wa kata watoe elimu na kuadhimisha siku za lishe kwa kupika chakula bora, katika kila kijiji na kata ili kuhamasisha kila shule, iwe na klabu ya Lishe ili kuwahamasisha wanafunzi,wazazi na walezi ili kupambana na utapia mlo, na kuhamasisha akina mama kuwanyonyesha watoto kwa muda wa miezi 6 bila kumpa mtoto chakula chochote.

Ameongeza kuwa hali ya Lishe Wilayani Nyasa ni nzuri lakini tunatakiwa kujikita kwenye uhamasishaji jamii  kula vyakula bora tangu ngazi ya vijiji na kata ili wananchi waweze kuwa na afya bora

Aidha ametoa wito kwa viongozi wote wilayani Nyasa kutoa ripoti ya utekelezaji wa hali ya lishe kwa ngazi zote za utawala.

Mkuu huyo pia amesimamia utiaji saini ya mkataba wa Lishe kati ya Watendaji kata na Mkurugenzi Mtendaji Wilaya ya Nyasa ndugu Jimson Mhagama, na kuwataka kusimamia mkataba huo vizuri kwa kuhakikisha jamii inakula vyakula bora,kwa kuwa mkataba huo kuwa ni maagizo ya Mh, Rais wa Jamhuri ya Muuungano wa Tanzania Mh. Samia Suluhu Hassan..