DC NYASA Awahamasisha wananchi kupata chanjo ya Corona

Posted on: August 6th, 2021

Mkuu  wa Wilaya ya Nyasa Kanali Laban Thomas, leo amewaongoza wananchi wa Wilaya ya Nyasa katika  zoezi la Chanjo ya Corona kwa Wilaya ya Nyasa,  katika Kituo cha afya Mbamba bay Wilayani Nyasa.

 Akizindua chanjo hiyo, amewataka wananchi wa Wilaya ya Nyasa kujitokeza kwa hiari bila kulazimishwa, kupata chanjo ya Corona itakayosaidia kujikinga na ugonjwa wa  Corona.

Kanali Thomas amefafanua kuwa, Wilaya ya Nyasa imepokea jumla ya Chanjo 2390 na imelenga kutoa kipaumbele kwa makundi maalum, ambayo ni Watoa Huduma za afya, waliokuwa na Miaka kuanzia 50 na kuendelea pamoja na Wenye magonjwa sugu  ya Sukari,presha na kansa.

“Leo ni siku ya Kuanza chanjo kwa Wilaya ya Nyasa, Nachukua Fursa hii kuwahamasisha wananchi wa Wilaya ya Nyasa kuchanja chanjo hii, ambayo ni muhimu sana, Kinga ni muhimu  sana inayoweza kusaidia kujikinga na Ugojwa wa Corona,na Chanjo hii ni ya Hiari,hatumlazimishi mtu na zinatolewa bure kila mhitaji aje na wajitokeze kwa wingi ka Serikali ni wajibu wetu kuwahamasisha wananchi waijue na wajitokeze kwa wingi”. Alisema Kanali Thomas.

Aidha amwewahamasisha wananchi wa Wilaya ya Nyasa, kujitokeza kupatiwa Chanjo hiyo itakayowasaidia kupambana na Ugonjwa wa Corona. Amesisitiza kuwa Chanjo hiyo inatolewa bure na kila mwenye uhitaji wa kuchanja achanje ili aweze kupata kinga ya kupambana na Ugonjwa huo.

Amevitaja Vituo vinavyotoa chanjo ya Corona kwa Wilaya ya Nyasa kuwa na Kituo cha Afya cha Tingi, Kituo cha Afya cha Mkili na Kituo cha Afya cha Mbamba bay.