DC Nyasa atoa Siri ya kunufaika na ujenzi wa Bandari ya Mbamba bay

Posted on: April 18th, 2024

MKUU wa Wilaya ya Nyas mh.Peres Magiri, amewataka wananchi wa Wilaya ya Nyasa Kufanya kazi za kilimo kwa bidii na maarifa, na kujiandaa jinsi ya kunufaika na ujenzi wa Bandari na miundombinu ya Barabara iliyoboreshwa na Serikali ili waweze kujiletea maendeleo

 Ameyasema hayo tarehe 17/04/2024 wakati  akiendelea na ziara ya Kujitambulisha. kusikiliza kero za wananchi, na kuzitatua katika Vijiji vitatu vya Mkalole, na Kilosa Vilivyopo Kata ya Kilosa na Kijiji cha Mbamba bay Kata ya Mbamba bay  Wilayani hapa.

Mh. Magiri amefafanua kuwa, Kilimo ni uti wa mgongo wa Taifa letu ambalo huajiri asilimia zaidi ya 80 ya wananchi wetu hivyo, wananchi wa Wilaya ya Nyasa wanatakiwa kulima kilimo chenye tija na kuwataka wananchi wa mwambao mwa Ziwa Nyasa kutotegemea Uvuvi pekee, amewataka kulima mazao kama vile Mahindi maharage na Mpunga kwa kuwa mazao yote hayo yanastawi vizuri.

Ameongeza kuwa njia pekee ya kunufaika na barabara ya Mbinga mbamba bay na ujenzi wa Bandari ni kuzalisha na kuongeza uzalishaji wa bidhaa mbalimbali.

Aidha Amewataka Maafisa kilimo kwenda mashambani na kuwahudumia wakulima Ipasavyo.

Akiwa katika Kijiji cha Mbamba bay amewataka wananchi kujiandaa jinsi ya kuitumia bandari ya Mbamba bay itakavyokamilika, kwa kuweka na kutengeneza miundombinu mbalimbali ya maduka makubwa na uzalishaji wa Mazao,kuwekeza kwa kuwa na Viwanja na nyumba ambazo zitatumiwa na wageni kutoka Nchi mbalimbali.

Ziara ya Mkuu wa Wilaya ya Nyasa itaendelea Tarehe 19/04/2024 katika Kata ya Mbaha atapofanya mkutano wa hadhara na wananchi wa Kata hiyo.

Imeandaliwa na Netho Sichali

Kitengo cha Mawasiliano Serikalini, Wilaya ya Nyasa