DC NYASA AKABIDHI PIKIPIKI KWA MAAFISA UGANI AWATAKA KUONGEZA UZALISHAJI MAZAO

Posted on: June 20th, 2022

Halmashauri ya Wilaya ya Nyasa Tarehe 20.06.2022 Imegawa pikipiki  22 kwa maafisa Ugani ili waweze kutekeleza majukumu yao kwa ufanisi.

Hafla fupi ya Ugawaji pikipiki, imefanyika katika Viwanja vya Ofisi ya Mkurugenzi Mtendaji wa Halmashauri ya Wilaya ya Nyasa, na Mgeni Rasmi alikuwa ni Mkuu wa Wilaya ya Nyasa Kanali Laban Thomas akiwa akiwa ameambatana na Viongozi wa Chama cha Mapinduzi (CCM),Wilaya ya Nyasa.

Akikabidhi Pikipiki hizo, Mkuu wa Wilaya ya Nyasa Kanali Laban Thomas amemshukuru Rais wa Jamhuri ya Muungano wa Tanzania Mh. Samia Suluhu Hassan, kwa kutatua Changamoto za usafiri kwa maafisa kilimo, kwa kuwa walikuwa wanachangamoto kubwa ya usafiri lakini kwa sasa amewataka, maafisa hao kufanya kazi kwa bidii na kuacha visingizio kwa kuwa wameshapewa usafiri hivyo wahakikishe wanatatua changamoto za wakulima na kuongeza tija hasa katika uzalishaji wa mazao mbalimbali.

Aidha amewataka kuzitunza pikipiki hizo na kuhakikisha wanazitumia kwa maslahi ya wakulima wa Wilaya ya Nyasa na hatimaye kutengeneza utofauti kipindi hawana usafiri na sasa, baada ya kupata usafiri hasa katika kuongeza Uzalishaji wa Mazao.

Mwenyekiti wa Chama cha Mapinduzi Wilayani Nyasa Crodivic Duwe amewataka maafisa ugani kuongeza ari ya kufanya kazi kwa kuwa serikali imewapa motisha ya usafiri hivyo kwa kuwa Wilaya yetu ni ya kilimo waongeze uzalishaji wa mazao mbalimbali.

Awali akitoa Taarifa Fupi, Mkuu wa Idara Kilimo Umwagiliaji na Ushirika Pasifiki Mhapa  ameishukuru Serikali, kwa kutatua Changamoto ya Usafiri kwa maafisa Kilimo Nchini, kwa kuwa walikuwa wakishindwa kuwafikia wakulima wengi ipasavyo, lakini kwa sasa wanaenda kufanya mabadiliko makubwa kwenye sekta ya kilimo kwa kuwa kwa sasa watakuwa na uwezo wa kuwafikia wakulima wengi zaidi.

Maafisa kilimo waliopewa pikipiki wamesema watazitunza pikipiki na kutekeleza majukumu yao ipasavyo kwa kuwa awali walikuwa na changamoto ya usafiri kwa sasa watafanya kazi kwa bidii na kuwafikia wakulima wengi zaidi.

Imeandaliwa na Netho C.Sichali

Afisa Habari Nyasa DC

0767417597.