Dc Nyasa akabidhi gari kwa RUWASA Wilaya ya Nyasa, awataka madereva kutunza magari.

Posted on: August 25th, 2024

Mkuu wa Wilaya ya Nyasa Mhe. Peres  Magiri, amekabidhi gari jipya kwa Wakala wa Maji na usafi wa mazingira Vijijini (RUWASA), Wilaya ya Nyasa gari iliyotolewa na Wizara ya Maji kwa lengo la kutatua kero ya usafiri kwa mamlaka hiyo.

 Hafla ya makabidhiano imefanyika tarehe 23/08/2024 katika Ofisi ya Mkuu wa Wilaya ya Nyasa na kuhudhuriwa na watumishi pamoja na wananchi wa Wilaya ya Nyasa.

Akikabidhi gari hiyo mhe. Magiri amewataka madereva kutunza magari kwa kuendesha vizuri na kuipa huduma stahiki na kufanya matengenezo Kila inapohitajika.

Amempongeza Dereva wake  Geofrey Claudius kwa kuitunza vizuri gari yake, mpaka Sasa inaonekana bado ni mpya ukilinganisha na magari yaliyonunuliwa pamoja .

Ameishukuru Serikali kwa kuipa Wilaya ya Nyasa gari ambalo linakwenda kutoa huduma ya usafiri wa uhakika na kuhakikisha wananchi wanapata maji safi na salama kwa kutimiza  malengo ya Serikali, ya kuhakikisha ifikapo mwaka 2025, wananchi wote waishio Vijijini katika Mkoa wa Ruvuma, wanafikiwa na kupata huduma ya maji safi na salama kwa asilimia 85 na ifikapo 2030 wanapata huduma maji kwa asilimia 100.

Hivyo amewataka watumishi kuendelea kutekeleza majukumu yao ipasavyo kwa kuwa wameongezewa kitendea kazi Cha gari, na kutunza gari hii Ili iweze kudumu na kutoa huduma ya usafiri kwa muda mrefu.

Awali akitoa Taarifa fupi Katibu wa Mbunge wa Jimbo la  Nyasa. bi Anes Mihera kwa niaba ya Mbunge wa Jimbo la Nyasa mhandisi Stella Manyanya, amesema Serikali imetoa gari hiyo baada ya Mbunge kuomba akiwa bungeni, mara baada ya kuona Ruwasa ilikuwa Haina gari ya uhakika kuifikia miradi inayotekelezwa wilayani Nyasa na kuwataka watatue kero ya maji safi na salama katika Jimbo la Nyasa.

Amesema ataendelea kutatua kero za wananchi wa Jimbo la Nyasa na kuhakikisha miradi ya maji inaendelea kuwepo na inakamilika kwa wakati.

Meneja wa RUWASA Wilaya ya Nyasa Mhandisi Masoud Samila ameishukuru Serikali kwa kutatua changamoto ya usafiri katika mamlaka hiyo na atahakikisha anaitunza gari hiyo na kujenga miradi na kusimamia kwa umakini Ili kutoa huduma Bora ya maji safi na salama kwa wananchi wa Wilaya ya Nyasa.