DC Nyasa aipongeza RUWASA Mkoa wa Ruvuma,Aitaka kuendelea kutoa Huduma Bora kwa Wananchi

Posted on: August 16th, 2024

Mkuu wa Wilaya ya Nyasa Mhe. Peres  Magiri, amewataka watumishi wa Mamlaka ya Maji na usafi wa mazingira Vijijini (RUWASA), kuendelea na ushirikiano katika utendaji kazi ili kuhakikisha jamii iishio Vijijini inapata huduma ya maji safi na salama.

 Ameyasema hayo, tarehe 15-08-2024 wakati akifungua kikao kazi cha siku tatu, cha Watumishi Wa RUWASA Mkoa wa Ruvuma,katika Ukumbi wa St Vicent Mhalo, kilosa Wilayani Nyasa, chenye lengo la kuwajengea uwezo na kubadilishana uzoefu kwa watumishi hao.

Mhe. Mgiriri amefafanua kuwa, lengo la Serikali ni  kuhakikisha wananchi waishio Vijijini wanapata maji safi na salama ikiwa ni pamoja na kufikia malengo ya Serikali, ya kuhakikisha ifikapo mwaka 2025, wananchi wote waishio Vijijini katika Mkoa wa Ruvuma, wanafikiwa na kupata huduma ya maji safi na salama kwa asilimia 85 na ifikapo 2030 wanapata huduma maji kwa asilimia 100.

Hivyo amewataka watumishi kuendelea kutekeleza majukumu yao kwa kuzingatia weledi, taaluma na fani walizosomea ili kuhakikisha wanatekeleza miradi yenye ubora na endelevu na yenye tija kwa wananchi.

“Endeleeni kufanya kazi kwa kuzingatia maadili ya Utumishi wa Umma, kutekeleza majukumu kwa kuzingatia sheria, kanuni, taratibu na miongozo pamoja na kuhakikisha wateja wanapewa kipaumbele katika utoaji wa huduma na kuthamini mawazo mapya katika utendaji wa kazi”.

Ametoa wito kwa wafanyakazi  kuendelea kutoa elimu kwa wananchi juu ya  mabadiliko ya mfumo mpya wa malipo ya Serikali, kupitia Vyombo vya utoaji huduma ya maji ngazi ya jamii (CBWSOs) kwa kutumia namba ya udhibiti (control number) ambayo imepelekea kuwa na usimamizi mzuri wa matumizi ya fedha za umma.

Aidha ameipongeza RUWASA kwa kutekeleza majukumu yaipasavyo ikiwa ni pamoja na kujenga na kusimamia miradi ya maji na kutoa Huduma bora kwa wananchi.

Awali afisa Utumishi wa RUWASA Mkoa wa Ruvuma Bi Siwazuri Mwinyi amsema maagizo aliyoyatoa atayasimamia ili kutoa huduma bora kwa wananchi wa Mkoa wa Ruvuma.