BARAZA la Madiwani Nyasa lapitisha Bajeti ya Bilioni 3.92 za TARURA

Posted on: January 29th, 2022

Baraza la Madiwani wa Halmashauri ya Wilaya ya Nyasa, Tarehe 28.1.2022 limepitisha Bajeti ya shilingi bilioni 3,928,000,000   kwa mwaka wa fedha 2022/2023 kwa ajili ya kutekeleza miradi ya wakala wa Barabara za Mijini na Vijijini (TARURA) Wilayani Nyasa, katika  kikao kilichofanyika , Ukumbi wa Kepten John Komba Uliopo Mbamba bay Wilayani hapa.

Mwenyekiti wa Halmashauri ya Wilaya ya Nyasa Bw. Stewart Nombo,  ambaye pia ni mwenyekiti wa baraza la Madiwani amesema kuwa, Baraza hilo limeidhinisha mpango na bajeti ya maendeleo, kwa mwaka wa fedha 2022/2023, na kusema kuwa  bajeti hii imelenga kutatua kero za miundombinu ya barabara, ikiwa ni pamoja na kutekeleza Miradi ya Maendeleo, na kutoa wito kwa  madiwani  kutoa ushirikiano kwa wataalamu katika usimamizi wa miradi ya maendeleo inayotekelezwa katika Kata zao.

Aidha Baraza hilo limempongeza Meneja wa TARURA Wilayani hapa Mhandisi Thomas Kitusi kwa kusimamia na kutatua kero mbalimbali za barabara Wilayani hapa na kutoa wito kuendelea na ujenzi wa barabara na kuwatumia wakandarasi wenye mitambo ya uhakika na kuachana na wandarasi ambao hawana vifaa vya kisasa.

Akiwasilisha Mapendekezo ya  bajeti kwa mwaka wa fedha 2022/2023, Meneja wa TARURA Wilayani hapa, Mhandisi Thomas Kitusi  amefafanua kuwa, TARURA inatarajia kufanya matengenezo,ujenzi wa barabara kwa kiwango cha lami na ujenzi wa madaraja kutoka vyanzo vya Fedha za Mfuko wa barabara, Tsh million 950,450,000, Fedha kutoka Mfuko mkuu wa Serikali Jimbo Milioni 500 na Fedha za tozo za mafuta Tsh bilioni moja na Fedha za Mfuko wa barabara Maendeleo tsh Bilioni 1.47 na kufanya Jumla ya  Sh bilioni 3.928,000,000,

Mhandisi Kitusi amesema kuwa fedha za Mfuko wa Barabara zitajenga madaraja 5 na Km 95 zitatengeneza maeneo korofi nay a kawaida wakati Fedha za Tozo na Mafuta zitatengeneza barabara kiwango cha changarawe Kilometa 40.23 na madaraja 3.Fedha za Mfuko Mkuu wa Serikali-Jimbo zitajenga Kilometa moja ya barabara ya kiwango cha lami Mbamba bay kwa gharama ya milioni 500.

Aidha Fedha ya mfuko wa barabara- Miradi ya maendeleo zitatengeneza kilometa 21.4 na madaraja 2.

Imeandaliwa na Netho C. Sichali Afisa Habari Nyasadc.