BARAZA la Madiwani Nyasa lapitisha Bajeti ya Tsh Bilioni 24.9

Posted on: January 27th, 2022

Baraza  la Madiwani wa Halmashauri ya Wilaya ya Nyasa, tarehe 27.01.2022 limepitisha Bajeti ya   shilingi bilioni 24,937,805,490  kwa mwaka wa fedha 2022/2023 kwa ajili ya matumizi mbalimbali ya Halmashauri, katika  kikao kilichofanyika , Ukumbi wa Kepten John Komba Uliopo Mbamba bay Wilayani hapa.

Mwenyekiti wa Halmashauri ya Wilaya ya Nyasa Bw. Stewart Nombo,  ambaye pia ni mwenyekiti wa baraza la Madiwani amesema kuwa baraza  limeidhinisha mpango na bajeti ya maendeleo, kwa mwaka wa fedha 2022/2023, kwa kuwa bajeti hii imelenga kutatua kero mbalimbali za wananchi, ikiwa ni pamoja na kutekeleza Miradi ya Maendeleo, na kutoa wito kwa  madiwani  kutoa ushirikiano kwa wataalamu katika usimamizi wa miradi ya maendeleo inayotekelezwa katika Kata zao.

Akiwasilisha Mapendekezo ya Mpango wa bajeti kwa mwaka wa fedha 2021 2022,  Kwa niaba ya Mkurugenzi mtendaji Wilaya ya Nyasa, Ofisa Mipango wilayani wa Wilaya Bw. Jabir Chilumba amefafanua kuwa bajeti hiyo, inalenga kutekeleza Program mbalimbali zilizopangwa kufanyika katika Halmashauri. Kati ya Kiasi hiki Tsh 1,303,340,690.00 sawa na Asilimia 5 ni makusanyo ya ndani, Tsh 13,990,432,000 sawa na Asilimia 56 ni kwa ajili ya Mishahara, Tsh 1,022,606,000 sawa na asilimia 4 kwa ajili ya matumizi mengineyo, na  Tsh 8,621,426,800. sawa na asilimia 35 kwa ajili ya miradi ya maendeleo.

Mkurugenzi Mtendaji wa Halmashauri ya Wilaya ya Nyasa Bw Jimson Mhagama,  amewashukuru  madiwani na wataalam wa Wilaya ya Nyasa kwa kuandaa na kupitisha bajeti ambayo inalenga kutatua kero za wananchi na kuwataka kusimamia miradi ya maendeleo inayotekelezwa katika maeneo yao, kwa kushirikiana na wananchi, kutekeleza miradi hiyo na kusema kuwa Miradi hii inatekelezwa kwa fedha za walipa kodi, kwa hiyo ni jukumu la kila kiongozi kusimamia fedha hizo ili kujiletea maendeleo.

Kwa upande wao madiwani wa Halmashauri ya Wilaya ya Nyasa wamesema kupitia bajeti iliyosomwa na ikatekelezwa watakuwa hawana kero kwa wananchi kwa kuwa imetekeleza na kutatua changamoto zinazowakabili wananchi.