BARAZA la Madiwani latoa motisha kwa watumishi

Posted on: June 19th, 2025

Na Byarugaba Innocent, Nyasa DC

Mwenyekiti wa Halmashauri ya Wilaya ya Nyasa Mhe. Stewart Nombo ameongoza kikao cha mwisho cha baraza Maalum la mkaguzi na mdhibiti mkuu wa hesabu za serikali (CAG) lililoketi kwenye ukumbi wa mikutano wa Halmashauri Jumatano tarehe 18 Juni, 2025 kwa ajili ya kupitia na kujadili hesabu za serikali kwa Mwaka wa fedha 2023/2024 za Halmashauri ya Nyasa.

Mkaguzi Mkazi wa Mkoa wa Ruvuma Nicholaus Killinga ameipongeza Halmashauri ya Wilaya ya Nyasa kwa kuendelea kupata hati safi baada ya kupitia taarifa ya ukaguzi wa hesabu za Mwaka 2023/2024.

Mwenyekiti wa Halmashauri Mhe. Stewart Nombo amesema mafanikio yaliyofikiwa katika halmashauri ya Nyasa yanatokana na kufanyakazi kwa mshikamano na ushirikiano baina ya Chama Cha Mapinduzi, Wahe. madiwani na wataalam kwani mara zote wameendelea kuongea lugha moja wanapokuwa kwenye agenda za mapato na matumizi.

Kwa upande wake katibu tawala wa Mkoa wa Ruvuma Mary Makondo aliyefika kwa niaba ya Mkuu Mkoa wa Ruvuma amewapongeza Wahe. madiwani kwa kuisimamia vema halmashauri, Mkurugenzi na wataalam wake kwa kuendelea kufanyakazi kwa ushirikiano, weledi na ubunifu na kufanikisha kupata hati safi na kwamba hayo ndio malengo ya serikali ya awamu ya sita inayoongozwa na Mhe. Dkt. Samia Suluhu Hassan ya kuwahudumia wananchi

Mkurugenzi mtendaji wa Halmashauri ya Wilaya ya Nyasa Khalid Khalif kando ya kupokea pongezi kwa niaba ya wataalam na kuwashukuru Wahe. madiwani kwa ushirikiano walioonyesha katika kipindi chao cha uongozi, alieleza kuwa wapo watumishi wawili Ratifa Mchomvu na CPA Albert Mtungi kutoka kitengo cha fedha na uhasibu waliokuwa chachu ya mafanikio hayo kwa kufunga hesabu za Halmashauri kitaalam  na kuwaomba Baraza la Madiwani kuutambua Mchango wao kwa kuwapa tuzo maalum kama sehemu ya Motisha.

Aidha, Mkurugenzi Khalid alieleza zawadi zinazotolewa  kwa watumishi hao ni cheti cha pongezi na fedha taslimu kiasi cha shilingi 200,000.00 kwa kila mmoja ikiwa ni sehemu ya halmashauri kuutambua mchango wao na kutoa hamasa kwa watumishi wengine kufanya kazi kwa kujituma zaidi na kuzingatia sheria, kanuni, taratibu na miongozo iliyopo.

CPA Albert Mtungi akiongea kwa niaba ya wanufaikaji amelishukuru baraza la madiwani kwa kuutambua mchango wao na kwamba kitendo cha kuwapa zawadi kimewapa nguvu zaidi ya kufanyakazi kwa ubunifu na weledi huku sheria kanuni, taratibu, miongozo ya fedha iliyopo ikizingatiwa kwa maslahi mapana ya Halmashauri ya Nyasa na Taifa kwa ujumla.