ASILIMIA YA MAAMBUKIZI YA VIRUSI VYA UKIMWI WILAYA YA NYASA YASHUKA.

Posted on: December 2nd, 2018

Mkuu wa Wilaya ya Nyasa Mh. Isabela Chilumba amesema Kasi ya maambukizi ya virusi vya Ukimwi Wilaya ya nyasa imepungua kwa mwaka 2018 ukilinganisha na takwimu za upimaji za mwaka 2017.

Aliyasema hayo hivi karibuni (tar.01.12.2018) wakati akihutubia wananchi katika kijiji cha Lumeme Kata ya Lumeme alipokuwa mgeni rasmi katika maadhimisho ya siku ya Ukimwi duniani ambapo kiwilaya yaliyofanyika katika kata hiyo.

Bi Chilumba alifafanua kuwa kasi ya maambukizi ya virusi vya ukimwi katika Wilaya ya nyasa imepungua toka asilimia 2.1 mwaka 2017 hadi kufikia asilimia 1.3 katika mwaka 2018 na kupitia uhamasishaji wa kampeni mbalimbali watu wengi wamejitokeza kupima kama ifuatavyo, kwa mwaka 2017 jumla ya watu waliopima walikuwa 59894 kati yao wanaume walikuwa 26,358 sawa na asilimia 44 na wanawake walikuwa 33,536 sawa na asilimia 56.

Aliongeza kuwa waliogundulika kuwa na maambukizi walikuwa 1237 sawa na asilimia 2.1 wanawake walikuwa 724 na wanaume walikuwa 513.kwa mwaka 2018 hadi Septemba jumla ya waliopima walikuwa 79599 ambapo wanaume walikuwa 47,490 sawa na asilimia 60 na wanawake walikuwa 32109 sawa na asilimia 40. waliogundulika kuwa na maambukizi ya walikuwa 1,051sawa na asilimia 1.3 wanawake walikuwa 533 na wanaume walikuwa 518.

Hata hivyo mkuu wa wilaya aliwahamasisha wanaume wote katika Wilaya ya Nyasa  kupima ili wajue afya zao na kutokuwa waoga wa kupima afya zao na kutegemea majibu ya wenza wao ambao wameonyesha ujasiri wa hali ya juu ya kupima na kujua afya zao.

Pia alitoa wito kwa jamii kupima kwa hiari ili waweze kutambua afya zao na kujua kama wameathirika ili waweze kuanza kutumia dawa za kufubaza virusi vya ukimwi dawa ambazo serikali hutoa bure kwa lengo la kuwajengea uwezo na kuboresha afya za wananchi wake ambao wameathirika na virusi vya Ukimwi.

Naye Kaimu mganga mkuu wa Wilaya ya Nyasa Dkt Michael Mabisi akisoma risala kwa mgeni rasmi alisema jumla ya wagonjwa 4363 wanapata dawa za kufubaza makali ya VVU katika vituo vyote 27 vya kutolea huduma hiyo kati ya hao wanaume ni 1690 na wanawake ni 2678.