UPIMAJI SHIRIKISHI WA ARDHI WASHIKA KASI MBAMBA BAY, WANANCHI WAIPONGEZA SERIKALI

Posted on: November 30th, 2020

Halmashauri ya wilaya ya Nyasa Inaendelea na  zoezi la Urasimishaji wa makazi holela  ili wananchi waweze kumilikishwa kwa  kupatiwa hati miliki ya Viwanja vyao.Zoezi hili kwa sasa linaendelea katika Mji Mkongwe wa Mbambabay Wilayani Nyasa na Tayari Elimu ya Urasimishaji imeshatolewa kwa wakazi wa Mbamba bay na wameridhia zoezi hili kufanyika kwa kasi na kwa haraka kwa kuwa ilikuwa ni kero ya muda mrefu iliyokuwa inawakabili.Lengo la Halmashauri ya Wilaya ya Nyasa ni  kupima maeneo yote Wilayani hapa lakini kwa sasa wataalamu wa upimaji wa ardhi , wanaendelea na Upimaji anaofanyika katika Kijiji cha Likwilu, na sasa wako Mbamba bay, na Lengo ni kupima Viwanja 1500.Upimaji huu ni shirikishi ambao unawashirikisha kikamilifu wananchi,  na tayari Mkutano wa hadhara umefanyika wa kuwajengea uwezo wananchi juu ya Upimaji wa Maeneo yao, na wananchi wanachangia Tsh 50,000 tu kiasi ambacho ni rafiki kwa wananchi wetu wa Wilaya ya Nyasa.Pichani ni Wataalamu wa Ardhi wakiwa pamoja na wananchi katika mkutano wa kuwajengea uwezo wananchi juu ya upimaji shirikishi wa Ardhi uliofanyika katika viwanja vya Soko la samaki Mbamba bay Wilayani Nyasa.