CCM RUVUMA yampongeza DED Nyasa kuleta Vifaa Tiba

Posted on: August 13th, 2024

Mwenyekiti wa Chama cha Mapinduzi (CCM) Mkoa wa Ruvuma Mhe. Oddo Mwisho amempongeza Mkurugenzi Mtendaji wa Halmashauri ya Wilaya ya Nyasa Bw. Khalid Khalif kwa Kuleta Vifaa Tiba vya kisasa kutoka Ulaya ili kutatua changamoto, na kuboresha  Sekta ya Afya Wilayani hapa.

Pongezi hizi amezitoa Tarehe 13.08.2024 katika Hospitali ya Wilaya ya Nyasa alipotembelea kwa ajili ya kukagua na kukabidhi vifaa Tiba vilivyotopatikana kwa ushirikiano wa Halmashauri ya Wilaya ya Nyasa na  Shirika lisilokuwa la Kiserikali la Human Bridge la Nchini Sweeden.

Akikabidhi Vifaa Tiba vya kisasa amesema Mkurugenzi Mtendaji wa Halmashauri ya Wilaya ya Nyasa amefanya kazi kubwa sana ya kuomba na kupewa Vifaa vyenye thamani ya zaidi ya Bilioni 2.4 ambavyo vinakwenda kutatua changamoto ya vifaa Tiba katika Vituo vya kutolea  huduma za afya hivyo wananchi watarajie kupata Huduma bora za afya.

Ameongeza kuwa,Ubunifu uliofanywa na Mkurugenzi Mtendaji wa Halmashauri ya Nyasa ni mfano wa kuigwa na wataalamu wetu na sio kila kitu kuitegemea Serikali ifanye au ilete.

“tunakupongeza sana Mkurugenzi kwa kazi nzuri ya ubunifu kwa kuleta vifaa vyenye thamani ya Tsh Bilion 2.4 ili kutatua changamoto ya Vifaa tiba tunawataka wataalamu wengine waige mfano huu na sio kusubiri kila kitu kuletewa na Serikali”

Awali akisoma taarifa ya Vifaa hivyo Mganga Mkuu  wa Halmashauri ya Wilaya ya Nyasa Dkt.John  Mrina amesema vifaa tiba vinakwenda  kutoa huduma bora ya matibabu, kwa Wagonjwa watakaokuja kupata matibabu katika hospitali ya Wilaya na vituo vya Afya na Zahanati. Aidha Vinakwenda kuimarisha huduma Bora za Afya kwa Wananchi wa Wilaya ya Nyasa.

Amevitaja baadhi ya vifaa ni mashine ya usingizi (Anaesthetic.") ambayo awali kulikuwa na mashine moja na hii itakuwa ya pili, pamoja na mashine ya kuzuia damu isitoke wakati wa upasuaji. Hali itakayosaidia kurahisisha utoaji wa huduma ya matibabu kwa Wagonjwa.

Mkurugenzi Mtendaji wa Halmashauri ya Wilaya ya Nyasa Bw.Khalid Khalif , ametoa Pongezi kwa Serikali ya Jamhuri ya Muungano ya Tanzania inayoongozwa na Dkt. Samia Suluhu Hassan kwa kuwa na mahusiano mema kwa Nchi za Ulaya.